Mae’r DU wedi colli hyd at 90% o’i dolydd morwellt yn y ganrif ddiwethaf, sydd wedi cael canlyniadau negyddol i iechyd a gwydnwch ein systemau arfordirol. Yn 2019, ffurfiodd Prifysgol Abertawe, yr elusen Project Seagrass a WWF-UK gydweithrediad i ddechrau adfer rhywfaint o'r hyn yr ydym wedi'i golli. Ar yr un pryd, dros y chwe blynedd diwethaf mae Prifysgol Abertawe wedi bod yn arwain treialon ledled Cymru i ddatblygu dulliau priodol ar gyfer adfer morwellt. Yma yn Ngogledd Cymru, rydym wedi ymuno gyda’r partneriaid i gychwyn archwilio sut allwn ddod a’r prosiect cyffrous yma i Ogledd Cymru. Rydym wedi sicrhau cyllid gan Gronfa Dreftadaeth y Loteri Genedlaethol i gyflawni rhaglen waith adfer arfaethedig sy’n dderbyniol yn gymdeithasol ac yn ecolegol gadarn ac rydym ni eisiau i chi gymryd rhan. Wrth gymryd rhan fyddwch chi yn helpu ni i adfer morwellt yng Ngogledd Cymru.

Nid yn unig bod mawndiroedd yn gynefinoedd gyda fflora a ffawna tra arbennig, ond maent hefyd yn chware rhan bwysig mewn rheoli’r hinsawdd yn fyd eang. Yng Ngwarchodfa Natur Cors y Sarnau mae y swyddog prosiect newydd Richard Cutts yn gweithio â phartneriaid rhyngwladol i wella ein dealltwriaeth o’r brosesau sydd yn gysylltiedig, adfer mawndir a sut y gall ein gwaith gyfrannu at ymgyrch 30 by 30 yr Ymddiriedolaethau Natur.

Nid yw gwarchodfeydd natur ar eu pen eu hunain yn ddigon i achub ein bywyd gwyllt gwerthfawr rhag diflannu. I alluogi i fywyd gwyllt ffynnu ac ymledu, rhaid i ni greu mwy o ofod i fywyd gwyllt sy’n cael ei reoli’n well ac sy’n fwy cysylltiedig, gyda chyfleoedd i bobl fwynhau byd natur. Mae’r dull hwn o weithredu’n creu’r hyn rydyn ni’n ei alw’n Dirweddau Byw, sydd o fudd i bawb ac yn diogelu bywyd gwyllt.

Ymunwch ag Ymddiriedolaeth Natur Gogledd Cymru ar lwybr sain i archwilio Trwyn y Fuwch, perl arfordirol sy’n gyforiog o hanes, daeareg a bywyd gwyllt. Yn anheddiad Neolithig ar un adeg ac wedi’i siapio gan y chwarelu yn y 19eg ganrif, mae’r pentir yma bellach yn gartref i laswelltiroedd calchfaen bywiog, tegeirianau a glöynnod byw sy’n gwibio hyd y lle yn ystod misoedd y gwanwyn a’r haf. Mwynhewch olygfeydd syfrdanol o Landudno, y Gogarth a Môr Iwerddon.