Barn owl © Jon Hawkins Surrey Hills Photography
Ein blwyddyn wyllt
Rydyn ni eisiau gweld Gogledd Cymru sydd â mwy o gyfoeth o fywyd gwyllt sy’n cael ei werthfawrogi gan bawb: nod enfawr mewn byd lle mae bywyd gwyllt yn cael ei wthio i’r cyrion.
Ond eto – rydyn ni, yn staff, gwirfoddolwyr, aelodau a phartneriaid – yn cymryd camau bob un dydd i wella llefydd ar gyfer bywyd gwyllt ac i gryfhau’r berthynas rhwng pobl Gogledd Cymru a’r amgylchedd lleol. Gyda’n gilydd, rydyn ni’n gwneud byd o wahaniaeth. Eleni, rydyn ni wedi crynhoi ein gwaith mewn ‘adroddiad effaith’: cipolwg ar 55 mlynedd y mudiad lleol yn dathlu ei gyflawniadau. Mae rhai o’r prif ffigurau i’w gweld ar y dudalen yma o’r cylchgrawn, ond cofiwch ystyried darllen y ddogfen yn llawn. Gobeithio y bydd yn eich ysbrydoli chi i barhau i’n helpu ni i weithio dros y dyfodol gwylltach mae ein plant, a’n bywyd gwyllt, yn haeddu ei etifeddu.
Rhagair gan Howard Davies, Cadeirydd
Dros y flwyddyn ddiwethaf, rydyn ni wedi parhau i ehangu ein gwaith ledled Gogledd Cymru, gan adfer cynefinoedd, cefnogi ffermio sy’n gyfeillgar i fyd natur, adfywio ein moroedd ac ysbrydoli mwy o bobl i gymryd camau dros fywyd gwyllt. Er bod yr heriau sy’n wynebu byd natur yn parhau i fod yn sylweddol, mae’r cyflawniadau eleni yn dangos beth y mae posib ei gyflawni pan ddaw cymunedau, gwirfoddolwyr, ffermwyr, partneriaid a chefnogwyr at ei gilydd gyda nod cyffredin.
parhad ...
O ddychweliad y môr-wenoliaid i Gemlyn i nifer mwy nag erioed o oriau gwirfoddoli ac arweinyddiaeth gynyddol ymhlith pobl ifanc, mae’r adroddiad hwn yn dathlu’r cynnydd rydym yn ei wneud gyda’n gilydd a’r gwahaniaeth mae eich cefnogaeth chi’n helpu i’w greu bob dydd.
Fel Cadeirydd, hoffwn gydnabod cyfraniad eithriadol Frances Cattanach, a roddodd y gorau i fod yn Brif Weithredwr ym mis Ebrill 2026 ar ôl blynyddoedd o wasanaeth ymroddedig i’r Ymddiriedolaeth ac i adfer byd natur yng Ngogledd Cymru. Ar ran y Bwrdd, diolch i chi, Frances, am eich ymrwymiad, eich arweinyddiaeth a’ch effaith barhaol.
Ar yr un pryd, rwy’n falch iawn o groesawu Lindsay Thomas fel ein Prif Weithredwr newydd. Mae Lindsay yn ymuno â’r Ymddiriedolaeth ar amser cyffrous, gan ddod ag egni ac uchelgais newydd wrth i ni barhau â’n siwrnai tuag at ddyfodol gwylltach a gwydnach. Diolch i chi am fod yn rhan o’r siwrnai hon.
Diolch i chi am ein cefnogi.
