Mae pobl ifanc o bob cwr o Gymru wedi bod yn ymgyrchu dros leihau'r defnydd o blaladdwyr sy'n lladd gwenyn mewn gerddi a chartrefi. Darllenwch am yr hyn maen nhw wedi bod yn ei wneud i weithredu newid er lles bywyd gwyllt.

Yn ôl ym mis Ebrill 2023, fe wnaeth cyfranogwyr prosiect ieuenctid Sefyll Dros Natur Cymru gyfarfod i drafod syniadau ar gyfer ymgyrch. Roedden ni’n gobeithio cyflawni rhai o'r nodau sydd wedi’u rhestru yn ein maniffesto ieuenctid ni, a fyddai'n ysbrydoli newid ar lefel leol a chenedlaethol.

Fe gynhaliwyd ein cyfarfod cyntaf ni yng Nghwm Elan ym Mhowys lle gwnaethon ni benderfynu y byddai targedu defnydd o blaladdwyr domestig yn ein helpu ni i gyflawni llawer o'n hamcanion. Roedd y rhain yn cynnwys gwyrdroi colli bioamrywiaeth drwy leihau’r dirywiad mewn pryfed lle’r oedd hynny’n bosib, annog effeithiau cadarnhaol ar fyd natur gartref drwy newid agweddau'r cyhoedd, a lleihau'r defnydd o blaladdwyr erbyn 2030 drwy weithredu'n uniongyrchol. Fe arweiniodd hyn at greu'r ymgyrch 'Addewid i Beidio â Defnyddio Plaladdwyr'!

Yn ystod y misoedd dilynol, fe wnaethon ni gynllunio ein hymgyrch drwy gyfres o gyfarfodydd ar-lein lle roedden ni’n gallu ffurfio cynllun cydlynol gyda’n holl grwpiau ieuenctid gwahanol ledled Cymru, o Ynys Môn i Gaerdydd! Ein nod ni oedd creu casgliad o adnoddau digidol defnyddiol i ddarparu’r wybodaeth yr oedd ei hangen ar bobl i ymrwymo i leihau’r defnydd o blaladdwyr, i estyn allan at gymunedau drwy ddigwyddiadau cyhoeddus, ac i ddefnyddio cyfryngau cymdeithasol i helpu ein neges ni i gyrraedd cynulleidfa ehangach.

Fe wnaethon ni ofyn i bobl yn ein cymunedau ni wneud yr addewid canlynol i leihau eu defnydd o blaladdwyr:

• Defnyddio dewisiadau eraill heb wenwyn yn lle plaladdwyr yn eich gardd, ar eich balconi, neu yn eich bocs ffenest.
• Newid y ffordd rydych chi’n trin eich anifeiliaid anwes gyda thriniaethau chwain i osgoi rhyddhau’r cemegau i’r amgylchedd.
• Rhannu’r addewid gydag eraill yn eich cymuned a dathlu’r ffaith nad ydych chi’n defnyddio plaladdwyr yn eich cartref!

Fe dynnodd ein hymgyrch ni sylw Dŵr Cymru a gefnogodd ein neges bod plaladdwyr yn broblem gynyddol yn ein dyfrffyrdd a bod ychydig o newidiadau bach yn gallu gwneud gwahaniaeth mawr.

Yng Ngogledd Cymru, fe ymunodd ein fforwm ieuenctid ni, Môn Gwyrdd, â’i gilydd i drafod eu pryderon am effeithiau plaladdwyr ar fywyd gwyllt. Fe wnaethon ni gasgliad o bosteri a ddefnyddiwyd ar gyfer digwyddiadau pop-yp lle roedden ni’n gallu trafod ein hymgyrch gydag aelodau'r cyhoedd a gwleidyddion hyd yn oed.

Fe arweiniodd yr holl ymdrechion yma at daith i’r Senedd lle cawson ni gyflwyno ein maniffesto i wleidyddion a thrafod ein pryderon am fyd natur cyn COP16.

Mwy o wybodaeth am beidio â defnyddio plaladdwyr yma