Oedwch am ennyd a sylwi ar fyd natur ym mis Mehefin
Mae mis Mehefin yn teimlo'n wahanol. Mae'r golau'n oedi. Mae gwenyn yn suo o amgylch gerddi. Mae gwenoliaid duon yn hedfan uwchben. Mae blodau gwyllt yn gwthio drwy graciau yn y palmant. Ac rydyn ni'n eich gwahodd chi i sylwi ar y cyfan!
30 Diwrnod Gwyllt yw her natur fwyaf y DU. Ym mis Mehefin, dewiswch un peth gwyllt y dydd (neu ychydig bob wythnos) - o roi help llaw i fyd natur i sylwi ar bethau gwyllt ar garreg eich drws.
Cofrestrwch heddiw i dderbyn eich adnoddau am ddim yn y post ac ar e-bost. Ymunwch â miloedd o bobl sy'n cysylltu â byd natur, yn teimlo'n well ac yn gwneud gwahaniaeth cadarnhaol i fyd natur.
Os ydych chi'n byw yng nghanol dinas brysur neu yng nghefn gwlad, mae posib dod o hyd i fywyd gwyllt ym mhobman os byddwch chi'n treulio eiliad yn chwilio amdano.
O blannu blodau gwyllt ar gyfer gwenyn, i wrando ar gân adar neu adael i gornel o'ch gardd dyfu ychydig yn wylltach, mae ffyrdd diddiwedd i chi dreulio eich mis gwyllt.
Cofrestrwch heddiw i gymryd rhan yn 30 Diwrnod Gwyllt
Pan fyddwch chi'n cofrestru, byddwch yn derbyn:
- Negeseuon e-bost achlysurol rhwng nawr a mis Mehefin, yn llawn ysbrydoliaeth a straeon am fywyd gwyllt
- Eich nwyddau 30 Diwrnod Gwyllt digidol AM DDIM ym mis Ebrill 2026
- Adnoddau post ym mis Mai 2026 (os byddwch chi’n dewis yr opsiwn yma)
- Negeseuon e-bost dyddiol ym mis Mehefin, yn llawn syniadau syml, calonogol i'ch helpu chi i gwblhau eich her wyllt
Mae am ddim, mae'n hyblyg ac mae'n dechrau gydag un dewis bach. Cofrestrwch heddiw a gwnewch fis Mehefin 2026 yr un gwylltaf eto.
Mwy am 30 Diwrnod Gwyllt
Mae 30 Diwrnod Gwyllt yn her am fis, am ddim, sydd wedi'i chynllunio i ysbrydoli pobl o bob oed i gysylltu â byd natur yn ystod mis Mehefin. O wylio adar yn eich gardd i archwilio gwarchodfa natur leol, mae pob gweithred - mawr neu fach, bob dydd neu bob wythnos - yn eich helpu chi i ddod yn nes at natur.
Gallwch gwblhau gweithgaredd y dydd, neu ryw ddau mewn wythnos - beth bynnag fyddwch chi’n ei wneud, byddwch yn cysylltu â bywyd gwyllt, yn teimlo'n well ac yn helpu'r blaned ar yr un pryd.
The Wildlife Trusts
© Jon Hawkins Surrey Hills Photography
Lauren Heather
Penny Dixie
Cwestiynau Cyffredin
Beth sydd wedi'i gynnwys wrth gofrestru?
Mae gennym ni un her 30 Diwrnod Gwyllt sy'n berffaith i bawb sy'n cymryd rhan gyda phlant a fersiwn fwy addas i oedolion i bawb sy'n cymryd rhan heb blant.
Adnoddau post i blant
- Hadau blodau gwyllt
- Pasbort i arwain plant drwy gymryd rhan
- Cynlluniwr
- Poster
- Cardiau masnachu casgladwy
Adnoddau post i oedolion
- Hadau perlysiau
- Cerdyn cyfarch
- Cerdyn post rhwygo-i-ffwrdd i'w anfon at ffrind
- Cynlluniwr
- Poster
Bydd pawb hefyd yn cael mynediad at adnoddau digidol, gan gynnwys y canlynol:
- E-byst dyddiol gyda syniadau ac ysbrydoliaeth
- Canllawiau gweithgarwch
- Taflenni adnabod
- Bathodynnau cwblhau wythnosol i'w defnyddio ar blatfformau cyfryngau cymdeithasol
- Tystysgrif cwblhau
- Cynlluniau gwersi (ar gyfer addysgwyr)
Oes posib i ysgolion, busnesau a chartrefi gofal gymryd rhan?
Os ydych chi'n cymryd rhan gydag ysgol, grŵp gweithgarwch i blant fel y Sgowtiaid neu grŵp addysgu gartref, dewiswch yr opsiwn 'cymryd rhan gyda phlant'. Byddwch yn cael mynediad at gynlluniau gwersi 30 Diwrnod Gwyllt pan fyddwch chi'n cofrestru ynghyd â'r casgliad llawn o adnoddau digidol.
Os ydych chi'n cymryd rhan gyda chartref gofal neu fusnes, rydyn ni’n argymell dewis yr opsiwn 'cymryd rhan heb blant'. Byddwch yn cael mynediad at amrywiaeth eang o adnoddau a syniadau digidol drwy e-bost, y mae posib eu haddasu i weddu i'ch anghenion.
Byddaf yn cymryd rhan gyda phobl ifanc yn eu harddegau. Pa opsiwn ddylwn i ei ddewis?
Chi sydd i ddewis! Efallai bydd yr awgrymiadau dylunio a gweithgarwch ar gyfer yr opsiwn oedolion yn teimlo'n fwy priodol yn dibynnu ar oedran eich plentyn yn ei arddegau, felly byddem yn argymell hynny. Fodd bynnag, mae croeso i chi archebu adnoddau'r plant os ydych chi'n teimlo y byddai'n fwy priodol i'ch teulu. Cofiwch edrych ar ein holl adnoddau digidol ni hefyd!
A fydd bathodyn ffabrig ar gael eleni?
Bydd! Fe fydd y bathodyn ar gael yn nes at ddechrau 30 Diwrnod Gwyllt, a bydd ar gael ar wefan Pawprint.
Sut ydych chi'n defnyddio'r cardiau masnachu?
Mae'r adnoddau i blant yn cynnwys pedwar o gardiau masnachu casgladwy 30 Diwrnod Gwyllt.
Dyma gemau y gallwch chi eu chwarae gan eu defnyddio nhw.
Gêm: Brwydr yn steil Top-Trumps
Gêm syml, gystadleuol ar gyfer 2+ o chwaraewyr.
Beth sydd arnoch chi ei angen:
Yr holl gardiau masnachu bywyd gwyllt.
Sut i chwarae:
- Cymysgwch y cardiau a'u rhannu’n gyfartal. Mae’r chwaraewyr yn cadw eu cardiau mewn pentwr, gyda’u wyneb i lawr.
- Mae'r chwaraewr cyntaf yn dewis categori o'r cerdyn uchaf: Cyflymder, Prinder, neu Lefel Ciwtrwydd.
- Mae pawb yn darllen y rhif ar gyfer y categori hwnnw ar eu cerdyn uchaf.
- Mae'r rhif uchaf yn ennill y rownd!
- Mae'r enillydd yn casglu cardiau uchaf pawb ac yn eu rhoi ar waelod ei bentwr.
- Mae'r chwaraewr nesaf yn dewis categori.
- Daliwch ati nes bod yr holl gardiau gan un chwaraewr – y chwaraewr hwnnw ydi’r pencampwr bywyd gwyllt!
Cyngor campus: dywedwch wrth eich ffrindiau am archebu eu pecyn 30 Diwrnod Gwyllt - po fwyaf o bobl sy'n chwarae, y mwyaf o gardiau y gallwch chi eu casglu!
Gêm: Pwy Ydw I? Gêm ddyfalu
Gwych ar gyfer hwyl i grwpiau, teuluoedd neu yn yr ystafell ddosbarth.
Sut i chwarae:
- Mae un chwaraewr yn dewis cerdyn heb ei ddangos i unrhyw un arall.
- Mae’n darllen y cliw "Pwy ydw i?" yn uchel.
- Mae’r chwaraewyr eraill yn cymryd eu tro i ddyfalu'r anifail.
- Y cyntaf i ddyfalu’n gywir sy'n ennill y cerdyn!
- Daliwch ati i chwarae nes bod y dec o gardiau wedi dod i ben.
- Y chwaraewr gyda'r nifer mwyaf o gardiau sy'n ennill.
Dewisol:
Gall y chwaraewyr ofyn cwestiynau ie / na am her ychwanegol.
Be' sy' ymlaen?
Diolch yn fawr i chwaraewyr y Loteri Cod Post, sydd wedi helpu i wneud yr her 30 Diwrnod Gwyllt yn bosibl.
