Ynglŷn â'r digwyddiad

Ymunwch â Gary Jones, ffotograffydd proffesiynol, i ddysgu mwy am weilch y pysgod anhygoel Llyn Brenig. Byddwn yn dechrau yn Ystafell y Gweilch y Pysgod yn y Ganolfan Ymwelwyr, lle bydd Gary yn rhannu stori ryfeddol y gweilch – eu mudo anhygoel, eu dychweliad i Ogledd Cymru, a bywydau'r adar sy'n nythu yn y Brenig.

Mae gweilch y pysgod wedi bod yn angerdd i Gary ers dros 20 mlynedd, ac yn ystod yr amser hwnnw mae wedi treulio oriau di-ri yn tynnu eu lluniau a'u gwylio. Bydd yn rhannu rhai o'i hoff luniau, straeon o'r maes, a'r eiliadau sydd wedi gwneud iddo syrthio mewn cariad â'r adar nodedig yma.

Ar ôl y sgwrs, byddwn yn mynd i wylfan Ymddiriedolaeth Natur Gogledd Cymru, lle mae'r tîm gwirfoddol ymroddedig yn cadw llygad ar y gweilch y pysgod sy'n nythu drwy gydol y tymor magu. Mae'n gyfle gwych i ddysgu am y gwaith cadwraeth sy'n helpu i'w gwarchod ac i weld yn uniongyrchol sut mae'r prosiect yn gweithredu.

Wedyn byddwn yn mynd i Guddfan y Gweilch y Pysgod, dim ond 140 metr o'r nyth, lle, gyda rhywfaint o lwc, byddwn yn gallu gwylio'r adar wrth iddyn nhw bysgota, bwydo a gofalu am eu cywion. Mae gweld gweilch y pysgod o'r pellter yma’n brofiad gwirioneddol gofiadwy ac yn un sydd byth yn colli ei hud, dim ots sawl gwaith ydw i wedi bod yn ddigon ffodus i'w weld.