Anrhydeddu ein harcharwyr morwellt ifanc ni am achub ein moroedd

Dathlu arwyr morol am fynd yr ail filltir forol yng Ngwobrau Marsh

Mae tîm glanhau traethau yn Sir Lincoln, unigolion sy’n monitro siarcod yn Sir Caerhirfryn a dwy seren ddisglair y dyfodol o Ogledd Cymru wedi cael eu cydnabod yng Ngwobrau Gwirfoddolwyr Marsh ar gyfer Cadwraeth Forol heddiw, dydd Mercher 30ain Gorffennaf.

Yn bartneriaeth rhwng yr Ymddiriedolaethau Natur ac Ymddiriedolaeth Elusennol Marsh, mae Gwobrau Gwirfoddolwyr Marsh ar gyfer Cadwraeth Forol yn cydnabod y gwaith anhygoel y mae gwirfoddolwyr Ymddiriedolaethau Natur yn ei wneud i helpu i achub ein moroedd ni.

Fe gynhaliwyd y seremoni wobrwyo ar-lein fel rhan o’r Wythnos Forol Genedlaethol - dathliad blynyddol yr Ymddiriedolaethau Natur o foroedd y DU. Roedd y seremoni’n cael ei chynnal ar yr un pryd â'n digwyddiad casglu hadau morwellt blynyddol ni ac felly fe ymunodd ein henillwyr gwych ni a phartneriaid y prosiect â ni ar gyfer digwyddiad arbennig ym Mhorthdinllaen.

Gwobr Gwirfoddolwr Ifanc Marsh ar gyfer Cadwraeth Forol

Gyda chriw mor nodedig wedi eu henwebu, fe ddewisodd y beirniaid ddau enillydd ar gyfer Gwobr Gwirfoddolwr Ifanc Marsh ar gyfer Cadwraeth Forol, y ddau o Ymddiriedolaeth Natur Gogledd Cymru.

Oscar Basu smiles at the camera, wearing a North Wales Wildlife Trust branded high-vis with a cuddly toy badger perched on his shoulder

Oscar Basu, Ymddiriedolaeth Natur Gogledd Cymru: Cyd-enillydd

Fe sicrhaodd brwdfrydedd diddiwedd, gwybodaeth fanwl ac ymroddiad i fentora ei gyfoedion iau ei wobr i’r Hyrwyddwr Achub Moroedd, Oscar.

Dros y flwyddyn ddiwethaf, mae Oscar wedi gwirfoddoli mwy na 100 o oriau gydag Ymddiriedolaeth Natur Gogledd Cymru, gan helpu gyda gwaith maes fel plannu morwellt ac fel cynrychiolydd rhagorol i'r Ymddiriedolaeth mewn digwyddiadau cyhoeddus.

Mae'n fodel rôl anhygoel ac yn fentor i'r Hyrwyddwyr Achub Moroedd iau, ac mae pawb wedi sylwi ar yr effaith mae wedi'i chael ar y grŵp.

Anna Williams stands on a beach, in waterproof clothing and wellies, during one of her volunteer sessions

Anna Williams, Ymddiriedolaeth Natur Gogledd Cymru: Cyd-enillydd

Mae Hyrwyddwr Achub Moroedd arall, Anna, wedi dod yn llysgennad dros forwellt, gan gymryd rhan ym mhopeth o gasglu hadau i blannu a hyd yn oed siarad â gwleidyddion cyn COP16.

Yn ddibynadwy, yn ymroddedig ac yn barod i helpu bob amser, mae Anna yn awyddus i helpu i ledaenu'r neges am bwysigrwydd morwellt ac fe gyfrannodd erthygl ardderchog at gylchgrawn haf Ymddiriedolaeth Natur Gogledd Cymru.

Mae'r ddau wirfoddolwr ifanc wedi tyfu mewn hyder dros y flwyddyn ddiwethaf ac maen nhw'n rhannu angerdd dros rannu eu gwybodaeth ac ysbrydoli pobl eraill am gadwraeth forol.

Dywedodd Ymddiriedolaeth Elusennol Marsh:

“Rydyn ni’n falch o fod yn gweithio gyda’r Ymddiriedolaethau Natur unwaith eto eleni i gyflwyno Gwobrau Gwirfoddolwyr Marsh ar gyfer Cadwraeth Forol. Ers 2014, rydyn ni wedi dathlu ymrwymiad gwirfoddolwyr i ddiogelu’r moroedd a bywyd gwyllt y môr. Fe hoffem longyfarch yr enillwyr eleni ac edrychwn ymlaen at ddysgu mwy am y cyfraniadau amhrisiadwy maen nhw’n eu gwneud i’w hamgylcheddau a’u Hymddiriedolaethau lleol.”