Volunteer of the Year awards

Nine volunteers post in a line for a picture in front of a landscape view

Volunteers © NWWT

Gwobrau Gwirfoddolwyr 2025-2026

Hwrê i'n gwirfoddolwyr ni!

Bob blwyddyn rydyn ni’n talu teyrnged i wirfoddolwyr sydd wedi gwneud cyfraniad eithriadol tuag at ein gwaith ni. Rydyn ni’n hynod ddiolchgar i’n holl wirfoddolwyr ni – byddai’n braf iawn gallu tynnu sylw at bawb yn unigol!

Mae ein Bathodyn Aur cyntaf ar gyfer 2025-26 yn cael ei ddyfarnu i Pru Delaney

Mae Bathodyn Aur Ymddiriedolaeth Natur Gogledd Cymru yn wobr sy’n cael ei chyflwyno yn y Cyfarfod Cyffredinol Blynyddol i aelod sydd, ym marn y Bwrdd, wedi gwneud cyfraniad eithriadol at lwyddiant a chynnydd yr Ymddiriedolaeth Natur.

Pru Delaney

Pru Delaney © NWWT

Mae Pru wedi bod yn gwirfoddoli gydag Ymddiriedolaeth Natur Gogledd Cymru ers 2021 a, hyd yma, mae hi wedi cyfrannu mwy na 900 o oriau o'i hamser yn cefnogi ein gwaith. Mae hi'n wirfoddolwr rheolaidd ar draws ein holl warchodfeydd natur ni yng ngogledd ddwyrain Cymru ac mae hi wedi gwneud popeth, o docio coed yn Aberduna i glirio coed conwydd yng Nghors Maen Llwyd.

Yn ogystal â mynychu ein gweithgorau gwirfoddol wythnosol yn rheolaidd, mae Pru wedi gwneud cyfraniad eithriadol at fonitro glöynnod byw yn ein gwarchodfa natur ni yn Aberduna. Dros y pum mlynedd diwethaf, mae hi wedi ysgwyddo’r cyfrifoldeb llawn am arwain ein harolygon o löynnod byw, gan reoli un trawslun i ddechrau ac, yn fwy diweddar, rhoi sylw i ail un.

Mae'r gwaith arolygu yma’n gofyn am ymrwymiad sylweddol a pharhaus, gan gymryd llawer o'i hamser personol hi drwy gydol tymor y glöynnod byw. Rhwng mis Ebrill a mis Hydref, mae Pru yn ymweld â'r warchodfa bob wythnos pan mae'r tywydd yn addas, gan fonitro rhagolygon y tywydd yn ofalus a chynllunio ei hymweliadau i sicrhau bod yr arolygon yn cael eu cynnal o dan yr amodau cywir. Mae pob ymweliad yn cynnwys mwy na dwy awr o arolygu ac wedyn mae hi'n cofnodi'r wybodaeth yn ddigidol ac yn cyflwyno'r canlyniadau i gydlynydd rhanbarthol Cynllun Monitro Glöynnod Byw y DU (UKBMS). Mae ei hymrwymiad i gynnal yr arolygon yma wythnos ar ôl wythnos, drwy gydol tymor y glöynnod byw, yn gwbl anhygoel. Nid yn unig mae'r wybodaeth mae hi'n ei chasglu’n cyfrannu at gofnodion bywyd gwyllt; mae hefyd yn ein helpu ni i wneud penderfyniadau gwybodus sy'n seiliedig ar dystiolaeth, a fydd o fudd i löynnod byw a bywyd gwyllt arall yn Aberduna am flynyddoedd i ddod.

Mae'r wobr yma’n cydnabod ac yn dathlu cyfraniad enfawr Pru i'n gwaith cadwraeth ni yng ngogledd ddwyrain Cymru ac mae'n haeddiannol iawn.

Mae ein hail Fathodyn Aur ar gyfer 2025-26 yn mynd i Mike Potter!

Mike Potter

Mike Potter © NWWT

Mae Mike wedi bod yn gwirfoddoli gydag Ymddiriedolaeth Natur Gogledd Cymru ers 2020 ac wedi ymrwymo mwy na 1000 o oriau o'i amser i gefnogi ein gwaith. Mae'n un o'n gwirfoddolwyr pennaf ni, bob amser yn rhoi ei amser, ei frwdfrydedd a'i ymrwymiad i'n helpu ni i reoli a gwarchod y llefydd arbennig yma ar gyfer bywyd gwyllt.

Mae Mike bob amser wedi bod â diddordeb brwd mewn dod o hyd i ymlusgiaid ac amffibiaid a’u harsylwi. Mae ei angerdd dros y creaduriaid yma, sy'n aml yn anodd eu gweld, wedi datblygu'n gyfraniad eithriadol at waith arolygu a monitro ymlusgiaid ac amffibiaid Ymddiriedolaeth Natur Gogledd Cymru. Mae wedi arwain ar arolygu ymlusgiaid yn ein gwarchodfa natur ni yng Ngwaith Powdwr, gan helpu i wella ein dealltwriaeth o'r

poblogaethau o ymlusgiaid a chefnogi'r gwaith cadwraeth pwysig sydd ei angen i'w gwarchod nhw. Yn ystod y blynyddoedd diwethaf, mae wedi ymestyn y gwaith yma i warchodfeydd natur addas eraill ledled Gwynedd ac Ynys Môn, gan helpu i sefydlu ac ehangu monitro ymlusgiaid ar draws rhwydwaith gwarchodfeydd ehangach yr Ymddiriedolaeth. Mae Mike hefyd wedi mynd ati i hyfforddi, cefnogi a threfnu arolygwyr ymlusgiaid gwirfoddol eraill, gan rannu ei wybodaeth a'i frwdfrydedd a helpu i ddatblygu rhwydwaith ehangach o bobl sy'n ymwneud â'r gwaith pwysig yma.

Yn ystod y blynyddoedd diwethaf, mae Mike wedi ymgymryd â rôl answyddogol fel 'Ysgrifennydd Cymdeithasol', gan drefnu cyfarfodydd gwirfoddol rheolaidd yn ei gartref ei hun, mewn tafarndai lleol a hyd yn oed trefnu danteithion cymdeithasol cwbl haeddiannol ar ôl gweithgorau gwirfoddol yng Ngwaith Powdwr. Mae croeso mawr bob amser i’w gwrw cartref!

Mae'r wobr yma’n ddiolch enfawr i Mike am ei ymrwymiad, ei haelioni a'i gefnogaeth eithriadol dros y chwe blynedd diwethaf.

Mae ein Gwobr Gwirfoddolwr Ifanc y Flwyddyn ar gyfer 2025-26 yn mynd i Millie Williams!

Mae Gwobr Gwirfoddolwr Ifanc y Flwyddyn Ymddiriedolaeth Natur Gogledd Cymru yn wobr sy’n cael ei chyflwyno yn y Cyfarfod Cyffredinol Blynyddol i wirfoddolwr ifanc sydd, ym marn y Bwrdd, wedi gwneud cyfraniad eithriadol at lwyddiant a chynnydd yr Ymddiriedolaeth Natur yn 2025-26.

Millie Williams

Millie Williams © NWWT

Mae Millie yn unigolyn cwbl ysbrydoledig a ddechreuodd ei siwrnai gwirfoddoli gyda ni fel Hyrwyddwr Achub y Moroedd fel aelod o griw 2024/25. Yn 2025/26, daeth yn fentor i'r criw nesaf, gan weithredu fel model rôl i'w chyfoedion, helpu i gynnal sesiynau, a rhannu ei gwybodaeth a'i phrofiad gyda'n Hyrwyddwyr iau. Ers i raglen 25/26 ddod i ben ym mis Mawrth, mae Millie wedi parhau i fod yn un o'n gwirfoddolwyr ifanc mwyaf gweithgar ni drwy ein grŵp cyn-gyfranogwyr Hyrwyddwyr Achub y Moroedd, a hynny i gyd ar yr un pryd ag astudio ar gyfer ei harholiadau TGAU.

Mae ymroddiad Millie i warchod morwellt yn glir: dros y flwyddyn ddiwethaf, mae hi wedi bod yn bresennol ym mhob cyfle i gasglu hadau morwellt, eu plannu, a monitro'r safleoedd. Mae hi hefyd wedi chwarae rhan weithredol mewn digwyddiadau ymgysylltu â'r cyhoedd, gan gynnwys Eisteddfod yr Urdd, gan fagu mwy o hyder wrth siarad â phobl am y prosiect Achub Morwellt y Môr a'i gwaith fel Hyrwyddwr Achub y Moroedd. Mae ei chefnogaeth i weithgareddau cadwraeth forol eraill yr Ymddiriedolaeth yn cynnwys helpu yn Plast Off, ein digwyddiad glanhau traeth mawr blynyddol ni, cymryd rhan mewn hyfforddiant Shoresearch a chynorthwyo yn ein digwyddiad blynyddol, Picnic gyda Llamhidydd.

Mae Millie yn enillydd cwbl deilwng o'n gwobr Gwirfoddolwr Ifanc y Flwyddyn. Rydyn ni’n falch iawn ohoni ac yn hynod ddiolchgar am bopeth mae hi wedi'i gyfrannu at brosiect Achub Morwellt y Môr a'n rhaglen Hyrwyddwyr Achub y Moroedd.

Dyfarnwyd gwobr Grŵp Gwirfoddol y Flwyddyn i'n Grŵp Gwirfoddol gwych, Seasearch Cymru!

Mae gwobr Grŵp Gwirfoddol y Flwyddyn Ymddiriedolaeth Natur Gogledd Cymru yn cael ei chyflwyno yn y Cyfarfod Cyffredinol Blynyddol i grŵp o wirfoddolwyr sydd, ym marn y Bwrdd, wedi gwneud cyfraniad eithriadol at lwyddiant a chynnydd yr Ymddiriedolaeth Natur yn 2025-26.

Shoresearch volunteers

Shoresearch volunteers © NWWT

Mae gwirfoddolwyr Shoresearch Cymru yn grŵp nodedig o unigolion sydd wedi creu cymuned graidd o amgylch ein gwaith arolygu rhynglanwol. Mae llawer ohonyn nhw wedi bod yn mynychu bob mis ers dros dair blynedd. Drwy eu cyfranogiad cyson mewn arolygon rhynglanwol, mae'r aelodau wedi datblygu gwybodaeth nodedig am fywyd gwyllt morol ac, yr un mor bwysig, maen nhw’n mynd ati i rannu a throsglwyddo eu sgiliau a'u profiad i eraill. Mae'r brwdfrydedd a'r ymrwymiad yma ar y cyd wedi arwain at ganlyniadau eithriadol – ers mis Ebrill 2021, mae mwy na 15,000 o gofnodion bywyd gwyllt wedi cael eu cyflwyno ac mae mwy na 2,000 o oriau o waith gwirfoddol wedi cael eu cofnodi. Mae ansawdd a phwysigrwydd gwaith cofnodi'r grŵp yn cael eu cydnabod fwyfwy. Mae eu cofnodion yn sail i waith asiantaethau'r llywodraeth, myfyrwyr ymchwil a gwaith cadwraeth statudol. Fodd bynnag, mae cyfraniad y grŵp yn ymestyn ymhell y tu hwnt i gasglu cofnodion biolegol. Mae nifer o’r aelodau wedi dod yn rhan annatod o'n sesiynau 'Rhoi Cynnig Arni' cyflwyniadol a'n hadnoddau hyfforddi ar-lein.

Mae grŵp gwirfoddol Shoresearch Cymru wedi creu rhywbeth parhaol – rhwydwaith o bobl wybodus a brwdfrydig sy'n cefnogi ei gilydd ac yn ysbrydoli eraill i gymryd rhan. Mae'r cyfeillgarwch a'r cysylltiadau cymdeithasol sydd wedi’u ffurfio drwy'r gwaith arolygu yn rhan bwysig o'i lwyddiant ac yn cael ei gryfhau'n aml gan straeon a rennir am ddarganfod rhywogaethau anarferol, cyfarfyddiadau cofiadwy ac, yn anochel, tywydd eithaf heriol! Maen nhw’n dîm gwych o wirfoddolwyr ac wir yn haeddu'r wobr Grŵp Gwirfoddol y Flwyddyn ar gyfer 2025-26.

Da iawn a diolch o galon i’n holl wirfoddolwyr ni – ni fyddem wedi gallu cyflawni cymaint heb eich help chi.